總理李克強噚日落柯打，話要搞深港通，深成指應聲急彈500點，但同樣喺深交所上市嘅創業板股，指數就要逆市跌0.5%。
創業板股以往係內地炒家天堂，2013年曾勁升83%，而同期滬指和深指分別跌7%和11%。不過，滬港通消息一出，就將創業板ko，滬港通11月開通後，升幅2%，全年亦只有12%，大幅跑輸主板。
表面睇，話創業板股會受滬港通、深港通衝擊，極之無厘頭。兩邊根本唔係同一班客，北水南下要有50萬元人民幣投資門檻，一定係大戶。而玩深圳創業板主要係散戶，就算佢哋真係落嚟，可以喺滬港通名單選嘅仙股、細價股亦唔多，對創業板分流作用有限。
內地有券商報告話，深港通會帶來深圳股市估值的國際化，創業板影響會較大。
呢句好深奧，簡單嚟講，即係話創業板已經被自己人炒得太高，人哋會嫌貴。
而家深圳創業板平均市盈率61倍，的確係相當貴。不過，已經預咗創業板唔會被納入深港通名單，照計唔應該受到影響。講到底，都係因為創業板前年已經被炒過頭，而家借勢要回一回。
李可強