我們總對未知嘅將來存有一份好奇，新一年係好定壞，好想有人指點，未卜先知。美國父子兵Yale＆Jeff Hirsch編制《The stock trader's almanac》，就好似「股市李居明」，年初好多人都會搵呢本年鑑預測大市走向。美股2014年最後一個交易日跌市收爐，幸保住六年升勢，道指同標指上年全年計分別累升7.5%同11.86%，主要受惠美國經濟復蘇、低息環境同企業利潤增長。交易員年鑑概括今年係「5」字尾，美股繼續升。
呢個並非冧巴降，年鑑統計數據顯示美股今年落在三大政治環境：非美國總統大選年、總統第七年任期、同今年係十年循環期嘅中間年。美股集齊呢三個要素，道指回報均錄得雙位數增長。美股喺非總統大選年，過去76年都未輸過，道指、標指平均回報率達16%。每逢總統任期到第七年，道指回報率都有13%。 年鑑統計資料話，美股喺1885年以來，年份尾數為「5」都係牛市，道指平均回報28%；標指回報平均25%。只係2005年「5」字尾效應失蹤，道指回報跌0.6%；標指升0.3%。Yale＆Jeff Hirsch嘅年鑑屬於相信歷史經驗分析大市，好似傳統智慧「1月效應」，股市每年首月份嘅升跌幅預示今年行情。喺非美國大選年，標指嘅1月效應顯著，過去16年嚟九成係升市。歷史經驗值得參考，同時要緊盯市場埋伏危機包括油價熊市、美國聯儲局啟動加息同歐、日兩大央行嘅放水行動。
C+B
本欄逢周一刊出