亞洲電視拖欠員工薪水，2014年年底前，仍無法解決，於是在不知甚麼情況下，在12月底叫員工「袋住先」，只發十一月份薪水嘅半份。有老友問左丁山點睇，如何面對同類問題。老友係有意挖苦嘅，不過相識多年，九十年代之瘀事，攞番出嚟講，封晒塵啦，但估唔到嘅係，太陽底下無新事，欠薪拖糧到今天還是層出不窮，亞視既係老牌傳媒機構，由麗的轉型至今日，幾十年咯，好似冇一年講得真係風調雨順之豐收年，真係難為了一批又一批嘅投資者，啲投資者（股東）歷年聘用嘅管理人員當然亦大有問題，總之各有各慘，各有各不足。
左丁山管理傳媒，有撲水出糧經驗，亦有簽支票知道缺「水」嘅經驗，亦有幾個月冇糧出嘅經驗，所以老友記先至嚟問幾句，有意贈興。首先講撲水出糧，第一樣就係問股東攞水，股東話：「你估係ATM㩒機咩，你頂住先，我要安排一下。」點去頂？第二樣就係𠼮銀行俾O/D（透支），銀行家當然係識得嘅啦，識於微時嘅朋友嚟，銀行家話：「叫你老細加簽私人擔保，嗱，你還要負上道德責任㗎，我信你有口齒嘅啫，你千祈唔好呃我累我。」邊敢呃呀，托塔都應承，於是在農曆年前撲水成功，員工仲可以出雙糧㖭（因老闆應承咗），左丁山就一額汗，好彩後來老闆開到水喉，員工也爭氣，做到收支平衡，銀行家在2014年見到左丁山，還是老友。
第二次又係農曆年前老闆話要執笠，由清盤官接管盤數，左丁山滿頭大汗，眼淚水出埋，向老闆（大股東）求情，向員工及作者發放薪水稿費，軟硬兼施（乞求同情係軟，話發動年初一員工示威係硬），卒之老闆肯制，但條件係左丁山要放棄自己嗰份且不得根據合約索取分手費，逼於無奈，只好答應，於是以後幾年，兩袖清風，加入另一集團，又碰上老闆要大搞衛星電視，蝕到眼坦坦，動搖集團根基，全部高層（包括左丁山）冇糧出，老闆仲話左丁山有經驗，可做處理危機嘅財務董事㖭。呢次咪搞阿叔咯，下定決心遞辭職信，一於跳船，順便追討人工。老闆又好運噃，最後關頭透過左丁山舊下屬做中介人，搵到南洋白武士買入股份，可全身而退，左丁山當然冇得留低，所以左丁山好同情葉家寶㗎，在最困難關頭，俾人委任入董事局孭飛，佢都算膽大頭大咯，祝佢好運。