雖則話「有圖有真相」啫，但作為花生友，未必一定要靠圖先至笑笑口，尤其政治呢家嘢，一啲身體語言，更勝千言萬語，空穴來風，肯肯定點都有啲嘢一定係真嘅，唔使信足七成，信一成都足以叫杯啤酒慢慢享受。花生友最近聽聞，特首梁振英同佢原來嘅同路人、行政會議成員羅范椒芬嘅不和，越嚟越浮面嘞，各界都喺度打探，有乜嘢導火線令佢哋真正變成陌路人？
通識科或是導火線
是咁的。CY同飯焦不和，其實已經唔係新聞咯，事關政圈一早就傳出，CY當選後，只重視佢嘅忠心支持者，包括中央政策組首席顧問邵善波以及另一行會成員張志剛嘅意見，飯焦不獲重用，當然令飯焦唔開心啦。據聞CY上任搞親疏有別，唔肯同各界溝通，都係令飯焦好勞氣嘅原因，事關飯焦雖然係建制中人，但佢相對開明，私下都肯同泛民傾偈食飯，道不同啫，唔係要割席㗎嘛？
有官場中人話，飯焦對CY嘅不滿已經浮晒面，有人話見過佢兩個最近同場都面左左咁，好似貼錯門神，引起唔少人側目，政圈一班花生友都私下gossip，飯焦會唔會因為唔like政府想將通識科，由必修改為選修，反而唔去集中改善課程不足，冇對症下藥而嬲嬲豬？畢竟當年飯焦都係通識科推手之一嚟㗎嘛！唔知2015年，會唔會係佢哋正式向左走、向右走嘅一年呢？
花生友