通常入波唔慶祝不外乎一個原因，就係對手係自己之前效力過嘅球會，但上周六場英足盃第3圈賽事，西布朗喺新帥普利斯上任後首次領軍，主場大勝非聯賽嘅基斯赫德7:0，原本係值得慶祝嘅事，偏偏上演大四喜嘅前鋒比拉希奴，每球入波都唔慶祝，黑口黑面咁同隊友揸下手就算，食錯藥咁款。原來有傳球會唔畀呢位英格蘭新晉前鋒1月轉會，搞到佢好冇癮，就擺個臭款出嚟抗議。我求大俠覺得呢種嘴臉好唔要得，球迷入場打氣，竟然咁唔尊重球迷，要快啲送去勞改先得。
成日話英足盃係爆冷溫床，非聯賽嘅基斯赫德俾西布朗狂數，但另一隊斯巴坦斯就爭啲創造歷史，喺上半場一度領先英冠嘅伯明翰2:0，最後雖反輸2:3，但班球迷絕對收貨，球員亦都走去同場邊球迷握手致謝，呢啲先係榜樣！
識睇，一定係睇足英台【英波Live】：
http://soccer.appledaily.com
http://bit.ly/engballlive