「我就回去，別引出我淚水」，唔少高登巴打呢排聽到《可惜我是水瓶座》，肯定會對呢句歌詞有特別深嘅感受，事關當年呢個MV嘅女主角曾美華，前幾日告別有線電視，同大家講咗再見，粉絲要再見呢位女神，唔知要再等到幾時。
12月31日凌晨，有個消息對高登巴打好大打擊，話說高登女神、肥佬黎新抱曾美華，喺1點臨新聞結束前，對住觀眾講咗句：「多謝大家過去十年嘅支持與包容，有緣再見，bye bye！」
休息再出發
講完仲舉起thumb up手勢，原來佢報道完呢次新聞，就會結束十年有線新聞主播崗位。
八方聽聞除夕前一日、12月30日last day嘅曾美華，想休息一下再出發；有個囝囝嘅佢，會唔會全職做家庭主婦？八方相信亦希望唔會啦，否則高登巴打一定好心碎。而曾美華亦喺臨別前喺有線網站撰文，佢話喺有線電視工作期間「着實我是幸運的」，點解？因為由南亞海嘯、韓農WTO衝擊，立法會同特首選舉、美國總統大選、菲律賓人質事件、國教風波同佔中運動等，佢都有幸參與其中，獲益良多，仲話喺呢個大家庭「經歷過失敗，也取得過成績；有過鬱悶，亦有過歡喜」，雖然呢個時候要離開有萬般不捨，「但一個段落的結束，也是另一個階段的開始」，仲祝有線新聞收視節節上升。
李八方
mailto:[email protected]