杜利萊自從2014年最後一戰贏「好爽趣」同「好腳頭」起孖之後，手風返晒嚟，元旦日佢幫何良勝出「健康真知」，呢日尾場二班千六米，佢又做何廐殺手，夥拍「火紅人」貼欄帶到，個人跨年連勝三期冇斷纜，至於何良呢日早段場次，已經憑徒弟蘇狄雄贏咗「星夢」，最終自製284倍馬房孖寶，戰績理想。
「火紅人」出名襟跑兼忠心，今場因內地富豪潘蘇通愛駒「大印銀紙」一柱擎天熱到1.6倍，令「火紅人」有16倍分頭，結果杜利萊把握C加3欄特性，9檔起步落力搶埋欄，令到「火紅人」越放越順，即使133頂磅都能夠帶到，打破馬兒今季不勝困局。
呢場後上馬唔多着數，「得盛」追足一條直路都係第二，不過點都好過「大印銀紙」，後駒排大外檔，全程被頂在外疊蝕位無數，只能追入第三，馬迷嘔血咁滯。但「大印銀紙」表現已好過今場另一明星馬，吳婉芳老公胡家驊嘅「喜蓮歡星」，呢日胡家驊夫婦及一對仔女搞馬場家庭樂，齊入場為「喜蓮歡星」打氣，47歲的吳婉芳喺一對仔女身旁，好似三姊弟咁，果然好似食咗防腐劑咁，可惜「喜蓮歡星」直路騎落毫無反應只跑第11，不過芳妹依然一臉愉快，莫非咁就係保養容顏嘅終極因素？