唔少財金猛人追上到網絡潮流，好似財爺曾俊華就好鍾意寫網誌，就算出差去到世界各地，佢都會照寫，總之每逢星期日都一定會有篇網誌同大家交流。除咗財爺之外，港交所（388）行政總裁李小加都成日寫blog，舊年佢總共出咗12篇《小加網誌》，都算係勤力。
李小加嘅《小加網誌》今年踏入第四年，睇番佢舊年寫咗12篇網誌，雖然數字上唔夠前一年15篇多，但比起第一年寫得1篇咁大把，都贏足成條街。
體諒佢舊年有滬港通呢單牽涉中港股市嘅大刁要負責，相信佢真係冇乜時間寫到blog，保持到咁嘅數量都算係咁。加上，佢每篇網誌嘅份量都唔少，閒閒哋都過千字，最長一篇喺5月講滬港通，仲有成四千字。
聽聞孖屐唔少人都會追看小加網誌，好睇嘅，並唔係佢講咗乜東東，而係佢一時扮小朋友寫信畀聖誕老人，一時又大玩精神分裂一人分飾幾角，好佩服佢創意無限咁話。