財政司司長曾俊華上周日去咗沙田節少年棒球邀請賽決賽主持開球禮，一擊即中，成一時佳話，噚日佢喺網誌話，擊球之前好驚眾目睽睽下打空氣，多得同學「鬆章」，投球手慢速投球、又走近咗幾步，先令佢擊中冇失禮，話擊中嗰吓好爽，令佢諗番起以往喺美國打棒球嘅年輕日子。
喺美國讀中學嘅財爺話，對上一次打棒球已經係40幾年嘅事，當年因為環境困乏，佢同一對拉丁兄弟街坊死黨，就用掃把改裝成棒球棍，將紐約曼哈頓下東城嘅馬路變成棒球場，放學就同附近嘅街童打波，遇車經過先休息。形同「佔領」馬路嘅財爺仲話，當年因為擔心棒球打爛附近嘅窗，所以只係打平價膠波。