田草C加3欄呢日追又得、放又得，玩死馬迷咁滯！第七場三班千二米，何澤堯騎750萬身價之上季最貴拍賣馬「金珀龍華」一檔出閘，沿欄一放絕塵爆出10倍Win，捧走今屆博愛盃，何澤堯自11月19日「迎風起舞」後首次贏馬，力保華將一哥名銜，此駒亦拎到沙田第一Win，吳定強馬房同時打開2015年勝門。
「金珀龍華」之前贏兩次都係谷草，兼且都係由韋達經手，呢鋪交畀從未騎過之何澤堯發揮，勝在有兩磅減，就此氣走姍姍來遲之1.5倍全熱門莫雷拉座騎「活力寶」，幫吳定強打破接近兩個月頭馬荒，跑第三係冷門「勝將雄心」，殿軍「舞林高手」。其中「活力寶」兩連捷後斷纜，首度敗走田草。跑完呢場之後，吳定強連埋第三場「喜逸」入Q，總共拎咗一冠一亞，但仍繼續排喺練馬師榜最尾位置。
「龍華」系上個月10號贏過「龍華太旨」，事隔一個月，輪到「金珀龍華」報捷，養馬運返咗嚟。「金珀龍華」馬主深圳龍華鎮首富、百億富豪謝國輝的太太金沛橋，由於搞電影生意關係，與導演葉念琛相熟，呢日葉念琛亦有到場打氣，肥咗唔少嘅葉念琛話對賽馬亦有興趣，仲話「金珀龍華」好有實力，就好似佢執導嘅功力喎！