西甲歇完冬，今周正式重開，由於皇家馬德里同巴塞隆拿都喺周日先有波踢，上周六5場比賽嘅焦點，自然落咗喺有「王子」費蘭度托利斯回歸嘅馬德里體育會身上。馬體會仲喺禮拜日幫佢搞歡迎會，等佢着住19號紅白直間波衫同現場逾4萬粉絲見面。
歡迎會賣口乖冧粉絲
雖然王子因為未搞掂註冊，上周六主場迎戰利雲特只係座上客，但剪咗個新髮型畀球迷做見面禮嘅佢，都足夠令卡達朗球場陷入瘋狂狀態，周日出席馬體會幫佢搞嘅歡迎會時仲勁冧卡達朗球場逾4萬粉絲，佢話：「7年前我同馬體會嘅粉絲講拜拜，家陣我哋又重聚嘞。今日對我嚟講非常特別。我人生最痛苦時刻就係同馬體會分手，果時咁做係為咗令大家都可以成長。𠵱家我要幫馬體會繼續成為冠軍。」費托無論近年喺英超同意甲都變成過街老鼠，但佢喺馬體會球迷心目中依然係no.1，所以連場上班球員每入完一球波，都向呢位前輩致敬。
基沙文起孖3:1破利雲特
場波踢到18分鐘，馬體會已經領先，基沙文接應施古爾拉傳中頭槌頂入，佢入完波，即刻單腳跪喺地下，然後向看台做拉弓射箭嘅動作，馬體會粉絲一定唔會對呢個動作陌生，因為呢個就係費托嘅招牌慶祝動作，然後電視直播個camera man好識做，即刻zoom個大頭畀費托，見到佢笑得好鬼開心。
換邊後，基沙文再用頭槌入波擴大比數，一樣做呢個動作，雖然利雲特之後由艾沙亞追近1:2，但烏拉圭中堅高甸就喺82分鐘奠定3:1勝局，而且跟足基沙文，入波後做呢個射箭動作向費托致敬。費托可能心諗班隊友咁識做，入波都要我搶你哋鏡，點好意思呀？
我相信大家都好耐冇見費托咁開心，睇嚟返到成名地，佢先可以感受呢種喜悅。高甸賽後就話：「費托曾經喺呢度帶畀球迷好多驚喜，相信佢會繼續做好份內事，而且一定做得好。」
識睇，一定係睇足英台【英波Live】：
http://soccer.appledaily.com
http://bit.ly/engballlive