拜恩（右）日前喺對灰熊場波發火鬧林書豪，雖然之後已經知道係一場誤會，但接受訪問時仲痛罵美國嘅籃球體系，阻礙籃球員嘅發展咁話。
眾所周知，拜恩嘅童年係喺意大利度過；擁有第一身經歷嘅佢就話，歐洲球員整體技術都比美國球員好好多，皆因佢哋細細個就會學到正確嘅籃球技巧。相比之下，打開AAU（業餘運動聯會，將全國劃分成55個社區，年輕人可以代表自己嘅社區參加比賽）嘅美國後生仔，淨係識利用身體優勢橫衝直撞，又做埋啲有姿勢冇實際嘅高難度動作。
作為NBA一線球星嘅拜恩話，球員最忌唔係冇自信，而係不自量力，應該清楚知道自己嘅能力去到邊，仲順便作出呼籲，希望各位有志成為職業球員嘅小朋友，學好啲基本功先。佢又舉例，話西班牙嘅加素兄弟可以喺聯盟屈晒機，同埋馬刺大部份球員都係嚟自歐洲嘅外援，證明歐洲球員嘅質素真係高幾班。喺歐洲長大嘅球員係咪真係犀利啲就唔知，但湖人教練史葛就肯定好睇重拜恩嘞。上周六球隊練波，史葛就同記者講，嫌拜恩近排起手次數太少，想佢每場至少射番18至19球先夠喎。
識睇，一定係睇足英台【英波Live】：
http://soccer.appledaily.com
http://bit.ly/engballlive