中環國金軒係老闆、恒基地產（012）主席李兆基（四叔）其中一個飯堂，主廚仇健恩師傅爆料話，除咗肥膩嘢，四叔乜嘢都食，味道就要偏淡些少。好似最出名嘅蛇羮，四叔一到食蛇季節例必柯打，佢哋就會將味道調校得淡少少先畀四叔食。
仇師傅話，四叔冇一樣指定要食嘅餸菜，基本上乜都食，每次唔同，簡單如青菜、叉燒又啱，矜貴嘅蛋白炒燕窩、鳳城水魚絲又啱，甜品就比較鍾意食順德名物雙皮奶，呢一點可能同佢係順德人有關啦。
中環國金軒主持李煜霖師傅同時係四叔嘅御用廚師，每次都會為四叔親自打點菜單、食材，甚至親自操刀，仇師傅當然都會幫手。佢形容四叔好隨和，過年必定會派利是畀一班同事，至於封幾多錢利是，佢就堅稱唔記得喇喎。