金融市場炒作主題潮起潮落，為適者生存之地，投資同投機最忌持有偏見，以致藐視某個市場或行業出現轉勢的訊號，往往錯失入市的良機。
去年10月起，內地A股出現近年罕有之強勁升勢，但大浪初段，大部份人都對霉咗幾年嘅A股持有色眼鏡，即使內地監管機構致力引入外資，滬港通機制開通，以及內地銀行減息等一連串可能改變走勢的因素出現，亦無動於衷，繼續堅持中國爆煲論，悲觀主義上身。我認同金融市場總有日會出現大幅度調整的，但我更相信，發現泡沫形成時，聰明的做法是擁抱它，享受泡泡浴的樂趣，而不是及早離場，這亦是去年我喺報紙及電台不停講A股ETF非常吸引的主要原因，幅圖keep住咁靚，有乜好驚！A股「形」變一日未出現，仍可放心持有。
自由行又翻炒金股？
不過，當然知易行難，我一直極度睇好A股，所以亦極度重鎚，假期前見內地拆息有微微上升之勢，明明無形變出場訊號，懶醒目見獲利唔錯便減持，故此有半注享受唔到最近內地變相降準政策，只怪自己注碼過重，反而增加心理壓力，還好跌咗個柑執番過橙，假期前留意到另一概念。
內地元旦長假，大家可能會留意到內地自由行近月又再於本港鬧市湧現，購物意欲較年初時更高漲。先看統計處公佈數字，11月份內地訪港旅客人次按年升24.1%，較全年累績升幅16.3%高，即內地遊客並沒有因本地政治事件而減少，而且同月本地零售金額更錄得4.1%增長，總金額為農曆年後最高的月份，本地零售業似有走出谷底的勢頭，又係時候先把高人工、高租金等等成見放下，才作下一步分析。若鑽入項目分類，會發現藥物及化妝品升幅逾一成，腦海中立時彈出兩個冧把，莎莎（178）同卓悅（653）。不過兩隻股票幅圖就唔多靚仔，久唔久會聽到莎莎店舖被高價租金搶走，敗北商場舖，始終賣化妝品毛利追唔到高檔奢侈品，租金問題係莎莎同卓悅之死穴，仲未計一大堆加入競爭的廉價藥房，難怪較低檔的卓悅死得咁甘！
最畀得起租的三大行業（金行、珠寶及名牌奢侈品），幅圖最靚嘅係六福（590），搵到個支持位後，一浪高過一浪，似有爆頂之力，所以上周二我亦係facebook度講咗已加注。我有個推測，有部份內地股民過去兩個月已賺大錢，估計有人會想喺股市cash out部份資金，並換入其他資產。金條成為這轉內地人富起來後，第一站吸納之物。始終名錶只能帶一隻，名袋只能帶一個，但金條買多多都無妨，因為只是保存財富之物，所以今轉翻炒落嚟掃金都唔出奇。咁點解係六福升得最靚呢？同周生生（116）及周大福（1929）相比，估值最平，管理又唔錯，已經夠照。當然，升了咁多，上升空間得番一成左右，梗係唔追；不過，一理通百理明，六福（590）可以在去年10月底無人睇好，也變成萬千寵愛，水泥現在何嘗唔係無乜人睇好，上周五港股ADR下跌，如水泥股跟大隊調一調，再向上突破，不妨試扒逆水了。
張士佳
註：筆者持有六福股份