問點解A股勁升，專家會用流動性、估值空間等一堆術語來答你。不過筆者舊年去深圳同散戶傾偈，唔少人都話中央打大老虎，係睇好股市最重要理由。
記得前幾年熊市，筆者喺證券行聽散戶講市，到最後都係鬧共產黨腐敗。簡單嚟講，就係而家條氣順番啲，所以願意買多啲貨。
阿爺反貪與股市關係，好難量化。以下一則故事，可能透露內地投資者真實心態。2012年尾，筆者向一位內地投資界朋友請教，中共十八大有乜概念好炒，講咗一輪之後，佢多口講句，「其實將來還有沒有十九大，大家都不知道。」言下之意，對共產黨政權能否捱多五年，都唔樂觀（黨代會每五年開一次）。
中共制度問題多，係人都知，好似當年蘇共毫無先兆情況下冚檔，亦極有可能。
呢啲真心話，內地嘅券商唔會寫落報告，股民亦唔會周圍唱，但就影響佢哋投資心態，唔敢睇長遠，一味短炒。
過去兩年打老虎的確有改善民怨，中共十九大、甚至連二十大都開得成嘅機會大增，亦令股市氣氛改善。但反貪能否堅持，會否長期利好，就真要放長雙眼睇定。
李可強