江太史即係江孔殷，為清代最後一屆科舉進士，富有兼愛吃，經常在家設宴，佢命家廚做出嘅「太史菜」風行一時，中環國金軒主持李煜霖師傅（人稱李霖）就係江太史最後一位家廚李才嘅徒弟。
仇健恩跟到李霖師傅，喺廚藝上應該最有得着，點知佢認為師傅教得佢最多，係做人嘅道理。
「菜式係死嘅，做人係生嘅；技巧可以改，勤力、認真嘅工作態度先係最緊要」佢指，即使年過60，李師傅依然落手落腳，由早做到晚，「佢唔係指指點點就算，見大家忙嘅話，佢洗嘢都做」。
平日李師傅會靜悄悄企喺同事後面觀察，「佢會睇住你炒嘢，炒得唔好，佢要你再炒過，原先嗰碟你食咗佢」。
不過，「師傅同得你講，你就一定有嘢落袋」單憑呢句說話已經感受到仇師傅對李師傅尊敬之情，佢亦打從心底裏面佩服對方。