巫斯義昨日(1月3號)牛一，一對寶貝仔女都喺香港幫佢慶生，令佢老懷大慰。人逢喜事精神爽，阿巫今日落場跑馬特別生猛，第二場五班千六米，幫文家良馬房騎大熱門「常勝龍王」留放恰到好處，結果後發先至勝出。呢匹前李廐馬贏到轉倉後第二W，在文廐四戰兩冠兩季，保持今季不勝有位，兩win由阿巫一手包辦，氹到馬主鬼咁開心。
「常勝龍王」今場直路大半程受困，但此駒畢竟是前馬王「雄心威龍」之同母弟弟，潛力不凡，臨尾一望空，三幾步間即趕過今場閘前落飛之「兄弟醒」，結果後駒輸半身位跑第二，「兄弟醒」在港兩季累積兩亞，仲未識贏，呢場第三名係雷神重新接手之冷門「加有利」，第四名是「尚華盛甲」。
眾所周知，阿巫同文家良好夾，佢哋合作由2014贏到2015，近一個月內已經攜手勝出「特務飛龍」、「行善積福」同「常勝龍王」，文家良今季暫時16win，一半頭馬由阿巫經手，成個影子主帥咁款。