擂台上勇猛嘅「神奇小子」曹星如（Rex），其實私底下不知幾怕醜，每次講起另一半就面都紅晒。不過，呢位香港拳手前晚同女友阿嵐（Candy）低調成婚，婚禮上就罕有地發表愛的宣言，多謝識於微時嘅太太一直扶持，幫佢踏上職業拳擊路，認真sweet爆！
婚禮滿佈拳擊元素
2015年本地體壇第一件喜事，當然係Rex前晚喺帝京酒店筵開32席，同相戀5年半嘅女友阿嵐正式拉埋天窗。婚禮唔少得用拳擊元素做主題，連台上背景設計都加入一對拳套，開席前播出一對新人喺台灣影嘅婚紗相，甜蜜片段更加閃爆全場。雖然雙方家人都想低調行事，但前晚婚禮就俾唔少親友「出賣」，上載靚相令喜事曝光。
Rex知道後都好大方，whatsapp答謝記者嘅祝福，仲透過公關向老婆公開發表愛的宣言：「由初級教練到踏上職業路，阿嵐都一直陪伴喺我身邊。即使香港之前冇職業拳手，好多人都唔知我會唔會成功，但係佢都默默支持，實在非常開心可以娶到呢位好老婆。」
3月比賽蜜月讓期
Rex上年11月喺澳門擊敗印尼1哥沙保，達成職業拳壇15連勝。成功男人背後，就梗要有個抵得諗嘅女人，Rex喺取得呢個輝煌戰績之前，幾乎每年有一半時間都要離鄉別井，去菲律賓等地特訓，難怪新郎哥都特別感觸：「大多數女仔拍拖都想男友時刻陪伴，我就經常要飛去外地，仲每次一留就幾個月，只可以靠電話聯繫，但係阿嵐從來冇怨言，只係每日為我加油打氣，係我努力向前嘅一大動力。」
27歲嘅Rex暫定今年3月出戰世界冠軍資格賽，加上接咗唔少商業合作活動，新婚後暫定會留港備戰，雖然對手未定，但就會搵嚟唔同地區嘅高手做對打訓練，做足準備。為咗呢場大戰，度蜜月都要讓期，不過阿嵐咁錫老公，相信都唔介意等多陣啦！
識睇，一定係睇足英台【英波Live】：
http://soccer.appledaily.com
http://bit.ly/engballlive