華將今季都可謂多災多難，先有鄭雨滇騎「軍駒」未盡全力瀨嘢，停賽18個賽馬日，停埋今次先可復出，跟住近日輪到呂卓賢喪放「一馬當先」，即時停賽8個賽日，慘過梁天來呀！
好在，都仲有好多華將潔身自愛，其中一位係何澤堯，季初猛咁贏馬，雖然近期比較沉寂，但今期手馬份量唔差，有機會響2015年轉運。
好似第九場「沙池王子」吖，上仗澤堯仔首欠擒上去即跑第二，睇得出人馬好合拍，今期升上三班跑，只負114磅，好開嘅馬咁輕磅，機會當然突出。
仲有楊明綸同梁家俊兩位師兄，都啱啱響元旦有馬贏，今期楊明綸隻「風雲」泥地好，落班有利，話唔定又爆過。家俊仔則可睇住佢隻「歡喜」，李廐轉出來的馬可以好到你唔信，想食頭糊靠佢啦！