【本報訊】這個人，就是怪。他的歌，很地道，甚至乾脆以地區命名，由大埔到九龍城，由蘭桂坊到尖沙嘴，偏偏填上英文歌詞；明明是怕醜仔，卻夠膽死坐順風車橫越歐洲，拿着結他，在街頭自彈自唱。最離奇的是，在人人嚷着移民的今天，這個在英國長大的另類港仔，卻矢志回流，以鏡頭和歌聲，追尋香港回憶，「想做個地道嘅香港人」。離開，是為了回來，他是網絡唱作人徐嘉浩（Kevin）。
記者：呂麗嬋
走進Kevin位於火炭工廈的一人工作室，映入眼底的，是混雜了港味的英倫氣息。在曼聯球星簽名相與米字國旗地墊之間，是地道的香港道路指示牌和街市豬肉檔紅燈。「讀完中一已去英國，但15、16歲已下決心，將來一定要返嚟」。在倫敦，這個愛曼聯愛到自薦到奧脫福工作的波牛，地球走了一圈，最懷念的，是小時候樂而忘返的大埔廣福球場。
「除咗喺英國嗰十幾年，自細喺大埔生活，之前陳果拍咗套《紅Van》，觸發我為大埔寫首歌、為呢個地方拍片做紀錄」。拿着相機上路，從廣福道到大埔新街市；從大尾篤小巴站到廣福球場，大街小巷，剪輯成港味滿瀉的網絡歌曲《Tai Po》（大埔）任人下載，「可能都係熟悉嘅地方，但冇諗過咁受歡迎」。獲數萬點擊率，罕有打進主流電台英文歌曲年度推介榜，猶如強心針。
老區人情引共鳴
上月，他又創作了《Kowloon City》（九龍城），老區人情，一樣引起共鳴。「九龍城好多食肆，一講起食，就會諗到呢度，我有個小學同學係城寨原居民，加上阿姨喺度住，成日去」。地道泰國菜館，碩果僅存的老式校服店，由七彩生果檔到應節大閘蟹，中日泰地標食肆凝進鏡頭，熟悉的城市風景、難忘的集體回憶。有網友戲稱他是「區歌」之王，他打趣謂要拍勻18區有難度，但下一站，希望寫一首屬於灣仔的歌。
「我鍾意有歷史嘅地方，灣仔新舊夾雜，應該好有趣」。生於小康家庭，父母做醫護工作，12歲被送到英國寄宿學校讀書，「喺香港只讀過一年中學，但嗰一年，大班同學一齊去踢波，識咗最好嘅朋友。最期待農曆年，會因為唔可以同家人過生日，覺得好失落」。失去過，特別珍惜，別人渴望往外走，大學主修藝術史，卻矢志回來。
回港後，做過畫廊，又做過風牛馬不相及的playgroup教師，唱作人的美夢，卻很遙遠，「嗰時啱啱興起將自彈自唱片段放上網，我都係一分子」。朝早工作晚上創作，儲了幾年錢，半年前下定決心辭職全職創作。只是，唱作人的寶號再響亮都好，還是要生活，「收入唔穩定，平時都係靠出騷同儲蓄維持生活」。剛過去的聖誕，別人慶祝佳節，他就忙着為公司派對獻唱應節歌。
但他沒有自怨自艾，「我希望用幾年時間，全力以赴，睇吓得唔得，可能一年之後，我又搵番份朝九晚五嘅工，打回原形，但至少試過，將來唔會後悔」。勇往直前的性格，三歲定八十，「喺英國讀大學嗰時，我就試過同一個唔認識嘅喺網絡識嘅朋友，以坐順風車方式，由倫敦出發，途經法國同葡萄牙，到非州北部摩洛哥」。
以自給自足為傲
這次旅程，讓Kevin學懂人生中的無限可能，「人在路上，好多嘢，都要自己搵辦法解決」。出身小康卻不離地，以自給自足、不靠屋企資助尋夢為傲，這個八十後，相信在自由資訊下選擇的力量、更相信事在人為，「網絡世界無限大，可能好多人覺得，唱廣東歌、要惡搞同搞笑先會受歡迎，但我覺得，唔係只有一條路可以行」。由奧脫福回到大埔廣福球場，仍然天大地大。