今期（1月4日）第十場二班1600米，雖然唔係咩大賽，但就非常有可觀性，因為有唔少明星馬列陣，好似內地富豪潘蘇通嘅「大印銀紙」、吳婉芳老公胡家驊嘅「喜蓮歡星」、莎莎老闆郭少明嘅「美麗大師」，都可能係稍後打吡大賽嘅主角，其餘「酷男」、「得盛」及「品學兼優」等亦公認好有實力。
當然，最受注目會係「大印銀紙」，上場在港初出韋達撳住贏兩個馬位，不過要留意嗰場始終只係三班賽，亞軍「包裝奔馳」直路曾被嚴重碰撞，否則「大印銀紙」未必可以贏咁遠。
反而「喜蓮歡星」就真係惡到冇朋友，大家要知道呢匹馬喺英國新市場，其實已贏至2000米表列賽；所以上場在港初出跑1200米擺明嫌短好多，加上插入二班對手極強及排最外嘅13檔，可以話周身缺點，但佢居然一條直路成支箭咁追入季軍，如果跑多幾十米甚至可以贏埋，由此可見佢嘅質素真係極高，今次增程角逐1600米，梗係比1200米合適啦，仲要出到雷神策騎，而且排6檔，點會怕你13檔兼初跑二班嘅「大印銀紙」呀！