飲食專家劉健威最近在信報專欄透露，富豪飯堂福臨門賺錢能力驚人，在2013財政年度，灣仔店收入一億元，稅前利潤3135萬元，尖沙咀店收入4509萬元，稅前溢利1044萬元。以此數字伸算，灣仔店稅前利潤獲利率高達31.3%，尖沙咀店獲利率高達23.15%，可以講得係賺到笑，唔怪得劉健威呢位新亞校友（84藝術）話單睇福臨門嘅亮麗業績會害死人，因為整個餐廳食肆行業絕非咁好景，外行人若以為做飯店可以咁鬼好賺，蝕死未天光也。呢一行，左丁山所知者與劉健威略同，餐廳R一早有提過，收入一百元，毛利約七十元，要用嚟支付工資三十元，租金十五元以上，水電煤保險維修雜費利息加埋佔去另外十五元，稅前利潤如有十元（10%），已經管理得好好，邊度會有31%、23%咁爽㗎，不過或者福臨門係自己舖，冇計租金都唔定。
近年富二代時興經營餐廳，在旺區嘅一啲新興高級中西菜館，餐價高昂，都係富二代富三代投資嘅，佢地知道，今日人工貴，集團式經營小型平民食店，根本冇得做。
昨日講起之Bistro du Vin係3A級西菜餐廳，不知老闆是誰，係由「香港味之年賞」選出嚟嘅（此書由萬里機構出版，三聯商務應該有售），遠在堅尼地城爹核士街，仍然日夜滿座，其他四間3A級西菜就係文華酒店扒房、中環皇九三樓嘅Le Dome de Cristal，和記大廈二樓嘅Lawry's The Prime Rib及半島酒店嘅瑞樵閣（Chesa），五間3A級西菜之中，據食家V講，Bistro du Vin裝潢最街坊平民化，與其他四間嘅「豪裝」冇得比較，其廁所更非最好嗰種，但仍然得到神秘食客給予最高評價3A級，可見得神秘食客主要計較食物質素。
劉健威除寫食經食評，亦落手落腳經營餐廳。「香港味之年賞」內冇一間中菜能夠列入3A，最高只有2A，高格調者有嘉麟樓、文華廳，平民化者如一樂燒鵝及大埔墟群記清湯腩，一共十五間，包括陸羽在內，劉健威之留家廚房列入A級，神秘食客推介「百花釀竹笙」、「菊花魚雲羹」，另外招牌菜有酥炸廣島蠔、上湯煎粉果、黃鱔炒粉絲，與「江家菜」（預訂），江家菜即江太史家傳菜式，江獻珠女士逝世前曾向劉健威父子傳述江家菜竅門，於是今後可得流傳。經營食肆賺嘅係辛苦錢，唔好以為睇見他人開餐廳搵錢，似乎好容易，其實少啲心血灌注落去都會血本無歸，食就好嘞，投資餐廳？普通人咪制呀。