練馬師阿Paul蘇保羅07年憑「活力金剛」勇奪打吡大賽後，好多年都冇真正威過，一直都喺排行榜中下游浮沉，估唔到佢個倉今季突然中興，上月中旗下嘅「友瑩格」喺潘頓胯下一放到底，贏得香港短途錦標，係阿Paul首次在港贏國際一級賽，之後亦繼續保持氣勢，剛戰除咗爆隻老馬「御鋒」外，一對後生馬「點解」、「天笑」亦順利建功，真係旺氣逼人。唔講大家未必知，上季蘇廐一整季嘅總獎金乃1,900萬，但今季都未過一半，馬房總獎金已超過2,300萬，真係豬籠入水。
所謂跟紅頂白，今期（4日）賽事梗係要吼實蘇廐馬啦，其中頭場「鼓浪春風」就最值得留意，上次跑1400米排14檔，形勢惡劣，最後都追番唔少得第五，可見近態相當fit，今次跑1000米直路賽，正係佢最近一次嘅贏馬路程，千祈唔好以為嫌短呀；騎師李寶利啱啱同阿Paul合作勝出「點解」同「天笑」，兩個人非常夾，睇嚟「鼓浪春風」真係可以令阿Paul滿面春風！