現年31歲的08年港姐亞軍陳倩揚前日再獲麟兒，她順利誕下重7.3磅的囝囝，已有一子的陳倩揚非常開心，笑言肚皮不介意再開工，隨時再追。陳倩揚與老公陳浩然結婚四年，當年奉子成婚，3歲多的長子陳羲廷（Auryn）比媽咪還緊張，元旦晚上追問弟弟何時出世，隔着媽咪肚皮與弟弟傾偈，本來後日才是弟弟的預產期，但聽到哥哥愛的呼喚便搶閘出生，成為新年娛圈第一B。
陳倩揚昨日向傳媒報喜，囝囝的樣貌倒模自爹哋，鼻高高，輪廓突出，眼線深長，嘴唇紅紅，陳倩揚昨在電話中說：「我覺得細佬都似哥哥，又似爸爸，佢眼線好長，成日瞇吓瞇吓，睇吓大啲再似邊個。」陳倩揚表示生第一胎時，捱痛捱了40小時，但這次生幼子，只痛了七、八小時，她說：「係快過上次，但相對就痛好多，可能年紀大咗，相差三年，承受痛楚點低咗。」
「可以追多個」
家中添了小弟弟，陳倩揚指Auryn最興奮：「我之前同佢講細佬2015年就出世，元旦嗰日我仲同哥哥去摘士多啤梨，夜晚𠱁佢瞓，佢再問我，哥哥向我肚皮傾偈，好似呼喚細佬咁，冇耐我就作動，生咗細佬。」陳倩揚夫婦有過生第一胎經驗，老公這次知道老婆作動都非常鎮定，她說：「老公自己準備好晒，見我痛又同我按摩舒緩，佢今次冇手忙腳亂。」
問到陳倩揚還會追女嗎？她說：「可以追多個，家中老人家覺得越生得多越好，我就想時間分配好啲，畀到愛每個小朋友。」陳倩揚已開始給BB餵人奶，她說：「餵人奶可以建立親子關係，我一抱埋身，佢就識擘大個口。」BB出生時嘴唇紅紅，陳倩揚說：「大家都話BB好似化咗妝咁，姑娘仲笑佢頭髮好貼，似set好頭先出嚟。」
採訪：嵐山