阿燦廖偉雄一連三場的「燦神回歸演笑會七太救地球」前晚在九龍灣開鑼，昔日「笑聲救地球」拍檔細龜黃一山、仙樂都和《蘋果動新聞》動主播斌斌等有份參演。阿燦先後獻唱《網中人》和《中華民族》等歌，又以七太身份煮餸，籲大家鳩嗚時要小心及不要得罪中央，而王祖藍更上台跟阿燦合唱半首《掃墓》。
前晚又樂器演奏又魔術又耍功夫，似嘉年華多過似演笑會，細龜台上一番剖白最為人矚目和令人感動。細龜指96年成無綫棄將，其後為有線主持兒童節目，但因有線要集中資源搞娛樂新聞台，其他部門要節流，令細龜再成為棄將，要照顧太太和兩子的他在03年沙士再次失業，細龜說：「我好絕望，於是做咗件好儍嘅事，就係唔戴口罩出街，希望自己會感染到沙士，但最後失敗咗，因為成條街嘅人都戴晒口罩。既然上天畀我生存落去，就要好好生活落去。」
比失業打擊大
其後宋韶光介紹細龜北上搵銀，最終成功打開內地市場，但最令細龜擔心的，是患有腦白質發育不健全症的19歲大仔，細龜笑說：「唔知係咪當年阿燦拍我個頭拍到咁，隔代遺傳咗畀個仔，如果係，我一定起訴阿燦同胡大為。」
其後細龜又眼濕濕說：「每個父母都想睇到自己小朋友健康成長，但我大仔幾歲發現患呢個病之後就要一直坐輪椅。呢個打擊係我咁多年嚟加埋嘅打擊再乘N次方仲要大。同齡嘅年輕人應該拍拖四圍去，但大仔冇屋企人陪同就只能留喺屋企，如果25年後，阿燦再開騷，希望大仔已經康復，喺台上代表我致辭。」台下觀眾即以熱烈掌聲以示鼓勵。
採訪：譚倩宜
攝影：陳俊強
