有冇想像過，世界上有間球會，有不知名金主支持，又有神秘政治背景，長期打假波。球員識踢波，但又俾領隊指使一齊造波，總之成隊踢出嚟完全唔係波，連球證都黑哨埋一份；入場觀眾零，轉播收入零，但球會又繼續生存到落去。聽落好似第三世界，又或者金正恩私下嘅北韓甲組隊一樣，大家當然放長雙眼睇；終於，球會竟然拖糧，問你死未？追多幾追，都係出半份糧，球員開始自己清假，或者hea踢，有啲甚至自己敲門傾轉會，非常陰公豬。
出咗一斤力，竟然攞番八両，莫非家陣仲惡搵食過30年前，連半斤八両都唔只係理想，直情係非份之想？
恥笑「老周」之餘，其實都幾戥員工唔抵，有汗水冇薪水，有讚賞冇打賞，你有美斯嘅入球能力都冇用，一隊曼城都可以玩到變「廢城」。
老老實實，對佢哋嘅體育節目，最深刻乃80年代轉播英足盃，決賽好似係曼聯對愛華頓；而旁述，我只記得徐嘉樂，佢任職老周多年，神奇嘅地方係，佢評述所有球類活動，以至柔道乜乜乜，都有辦法用一把好專業兼入咪嘅聲，令你睇多兩眼。其實，喺一個弱台做體育節目，真係同南宋末期邊疆守關差唔多，點都要畀番個禮佢。
新年，感謝為出力而回報超低嘅香港人，你哋有甲組球員嘅能力、耐力同鬥心，勿忘初衷，離冧台又近一年了。另感謝體育版永遠準時出足稿費。
梁栢堅
填詞人+彩池人