謝拉特一話季尾離開利物浦，唔少球會都精神一振，想鬥快搶人！傳得最行嘅係幾支美職聯球隊，其中洛杉磯銀河最積極，開出同當年碧咸一模一樣嘅待遇，畀謝拉特一份為期4年總值2,000萬鎊（約2.4億港元）嘅合約。皇家蘇斯達教練莫耶斯亦伸出橄欖枝，邀請謝四過西甲；但謝四喺上周六嘅訪問入面講明，只會去美國，請莫帥食檸檬。
喺上星期五份離隊聲明入面，34歲嘅謝拉特表明唔會掛靴住，但未決定下季去邊間球會。謝四未有頭緒都係正常，因為大把球隊爭住要佢，其中銀河開出嘅條件最優厚。英國《每日鏡報》披露，銀河會畀謝四10萬鎊周薪，最緊要份約為期4年咁多，總值2,000萬鎊，可以養到佢39歲。
除咗待遇好，謝四揀去銀河仲有其他優點，例如銀河陣中有前隊友羅比堅尼喺度，可以幫到謝四適應新環境。最重要嘅係，銀河向來係美職聯嘅爭標分子，舊年先捧完季後賽冠軍，如果謝四去銀河的話，就好有機會一圓聯賽冠軍嘅美夢。雖然只係美職聯，但好過冇啦！
紐約城爭重組「雙特」
不過，洛杉磯銀河都唔係坐定粒六㗎，紐約紅牛、FC多倫多同紐約城3支美職聯球隊都希望搶到謝四返嚟。紅牛冇咗亨利，當然想搵個大牌返嚟，維持號召力，而且紅牛嘅足球總監正正係提拔謝四嘅恩師侯利亞，所以話唔定謝四會念舊情，去紅牛幫手。
FC多倫多就勝在出得起錢，佢哋願意開出同銀河一樣嘅條件，畀謝四10萬鎊周薪。紐約城已經有林柏特，當然想爭埋一份，合組「雙特」中場，夠晒噱頭，順便可以安撫到嗰班因林柏特延長租借到曼城而不滿嘅球迷。
除咗美國，喺西班牙已經有間球會等緊佢，就係「莫天才」話事嘅皇蘇。莫耶斯喺上周五嘅記者會上面話：「謝拉特喺英格蘭國家隊同利物浦都有一段非常成功嘅經歷，好難搵人代替佢嘅位置。如果佢想嚟西甲搵食的話，可以隨時打畀我。」
請莫天才食檸檬
修咸頓領隊朗奴高文都想博一博，公開話好想簽謝四，「我真係認真㗎，如果謝四想踢另一支英格蘭球會，佢可以嚟我度。」不過，謝四喺上周六接受利物浦嘅獨家專訪時話，佢只會去美國，莫耶斯同朗奴高文都冇行囉！
識睇，一定係睇足英台【英波Live】：
http://soccer.appledaily.com
http://bit.ly/engballlive