新年流流個個懷舊。叮噹可否不要老？謝四可否不要go？睇住一齊長大嘅朋友逐個離開自己，大家都心痛；而睇睇吓謝四，其實就係利記嘅叮噹。
叮噹忠心，唔知點解係都要黐住大雄，明明誰都喜歡你，跟技安搵食生活一定好過啲；而謝老四仲專一，冇錯，day one係利物浦畀機會佢，但之後有毛有翼唔同講法嘛，係都唔走，直到人哋嫌棄你。
叮噹法寶多，變化多端，人人都有我最喜愛的法寶，我嘅一票投畀誠實豆沙包！謝老四一樣多法寶，落場搓圓撳扁都得，前又得後又得，咩位都可以勝任，係唔記得有無守過龍啫。
咪以為叮噹成日大驚小怪，其實佢喺關鍵時刻往往相當淡定冷靜，大禍臨頭就會摷到啲好嘢出嚟，幫大雄逢凶化吉；謝老四更唔使多講，所謂「神奇隊長」就係能人所不能，正如一個魔術師俾人除晒啲衫，都仲可以喺頂帽入面變隻白兔出嚟！Fabolous！
香港叮噹迷多得林保全30年來嘅傳神演繹，令大家打開漫畫書見到叮噹話「大雄你仲唔做功課！」，真係好似有聲咁！講波佬唔使幫謝老四配音，但Peter某夜爆出一句「神奇頂級超卓」，就幫佢喺球場上嘅最佳時刻留低咗最深刻記號。
叫多啦A夢不是罪，但叮噹就係美好時代嘅暗號，嗌得出就係自己友；而任何球迷叫謝四做謝拉特的話，diehard極有限。但所謂「撒嬌女人最好命」，叮噹咁入屋並唔係因為佢乜都得，而係佢有啲嘢就係唔得。「嘩老鼠呀！」咁大隻貓都驚老鼠嘅？「等我嚟啦！」呢啲攞分位就留畀又懶又呆嘅大雄威吓啦！
謝老四一樣，盃幫你捧唔少，鑊一樣幫你孭埋。再鋒利嘅刀都有生銹嘅一日，再強壯嘅巨人都有仆倒嘅機會，謝老四嘅存在，令隊友要威時有得威，要受靶時唔使受靶。好多人成日好投入咁話勁妒忌大雄有叮噹，哈，虛構嘅你就咁上心，又唔見有其他球迷話，好羨慕利物浦有個乜都孭上身嘅神奇隊長喎。唔好意思，季尾之後可能有嘞。
相傳叮噹大結局有好幾個，最sad當然係話原來所有法寶同叮噹都係大雄幻想出嚟。另一個就幾勵志，話說大雄囝囝認為如果叮噹一直喺大雄身邊，大雄會一直依賴叮噹而一事無成，最終叮噹決定忍痛離開，而大雄終於肯發奮自立嘞！呢個結局，睇嚟最啱今日利物浦嘅各位大雄。
KEYMAN
節目主持