越亂越有機！本版換新裝，撞啱攰到爆嘅英超隊加入足總盃戰團，唔爆冷至奇；重心狙擊亂中亂嘅紐卡素，同剛贏兵工廠嘅修咸頓！
人唔係機器，見到「1哥」車路士原本鋼鐵嘅防線，突然全面崩潰失5粒，肯定同體力不繼有莫大關係。7、8日內捱完3場英超後，唔少球隊隔日要再喺英足盃出場；佢哋踢緊攞命波，鍾意刀仔鋸大樹嘅球迷，唔使對佢哋留情、手軟！
上屆第3圈，英足盃又重現「爆冷溫床」feel，曼聯、紐記、韋斯咸同維拉都提早玩完，聯賽冠軍曼城，要去到重賽，返主場先贏到英冠布力般流浪。今屆第3圈英超隊登場日，比去屆休息期仲少1日；頻密大戰、炒領隊踏入高峯期、傷停消息混亂，加埋部份外援已離英，備戰即將開鑼嘅非國盃同亞洲盃，今年可能爆得仲杰！
修頓缺文尼大損攻力
先講明日作客到修咸頓嘅葉士域治（圖）。英冠隊冇份踢元旦日大賽，休息期較英超隊充足，有望彌補平均質素差距，「老葉」近排英冠最銳，年尾大炒查爾頓後，保持11戰不敗，升到次席。老牌球隊現時賽程輕鬆，今戰冇留力爭升班嘅藉口。
相反修咸頓兩日前剛贏後防送禮、踢冇鋒陣嘅阿仙奴，表現唔算好出色。近排反彈嘅原動力、10號仔沙迪奧文尼要返非洲踢國家盃，後備中堅吉田麻也亦要走人；領隊朗奴高文必定大輪換應付盃仔，博2.9倍葉士域治[+1]屬今周首選。至於今晚重心，可攻擊「冇帥」紐記，唞1日即要南下作客、近排好有heart嘅李斯特城，見到紐記繼續用失失慌嘅3號門將艾洛域把關，李城讓平/半仍可捧。
今晚多波，但公仔廂只播1場英足盃，唔通講波佬都要唞吓氣？求賭，另外兩冷選英冠內訌戰，攻擊前列但勢轉弱嘅賓福特，讓唔起換咗蘇拿教嘅白禮頓；同博主場硬淨嘅洛達咸，掃走「1哥」般尼茅夫。
波神
神級攻略 智破足彩
識睇，一定係睇足英台【英波Live】：
http://soccer.appledaily.com
http://bit.ly/engballlive