唔少泛民已經仔大女大，仲做埋爺爺嫲嫲、公公婆婆，得閒就弄孫為樂，最近公民黨主席余若薇都加入「阿婆」行列，佢嘅寶貝女生咗個仔，搞到佢呢排忙官司同爭取普選之餘，仲可以弄孫為樂；不過同樣喺近排做第二任外公嘅何俊仁就冇Audrey咁好彩，而且仲因為冇時間見外孫而俾人笑。
先講Audrey榮升「阿婆」，佢個寶貝女添丁之後，令Audrey除咗忙於打官司、寫專欄、做訪問之外，仲要忙於同孫仔玩。八方元旦日見到Audrey，見佢容光煥發，心情好靚，問佢係咪弄孫為樂好開心？佢話老公胡健維醫生先係最開心。
點解？Audrey話，同個女住得好近，所以阿女每日都會送粒孫嚟探兩老，令胡醫生日日都好開心咁抱孫，抱到唔肯放手，試過一次馬拉松式抱足三粒鐘，抱到兩爺孫都瞓着咗。Audrey近月都成日將孫仔相放上fb開心share，呃like能力勁過Audrey月旦政事嘅post。
仁哥見外孫俾人笑
咁Audrey同佢老公日日弄孫為樂，但係近排做第二任外公嘅何俊仁就因為外孫仔喺佔領期間出世，搞到仁哥冇時間睇個外孫仔，仁哥雖然同八方講，當時要以大局為重，冇法子第一時間睇個外孫，咁都冇辦法，但八方聽得出佢有啲遺憾，仁哥話後來要個女帶埋個孫，趁食飯帶畀佢見面，但呢個飯局同場仲有李卓人、李柱銘等，結果仁哥俾佢哋笑，話做人外公竟然同班uncle一樣時間，先見個孫仔第一面！
李八方
mailto:[email protected]