英國足總盃一向係爆冷溫床，第3圈開始有英超隊加入，而英超剛踢完快車檔期，盃賽十居其九出副選，所以轉吓戰場，先去澳洲，今日有場FC悉尼對紐卡素噴射機（圖），嚟個「讓球主客和」吼「客勝」，主隊FC悉尼近況差，一定想反底，但唔係咁易囉。上場對布里斯班獅吼，雖然0:0和到，但比賽中後防錯漏百出，唔輸真係有運，咁嘅狀態想贏粒糖，可能反而輸間廠！
紐卡素噴射機近況同樣麻麻，但係至少入到波，上場大敗畀墨爾本城，但仲有傳中呢個入波瓣數，兩邊踢到畀前鋒艾臣蒙達路就有機㗎喇！另一場係西甲拉科魯尼亞對畢爾包「半場主客和」要和波，主因兩隊前線狀態都麻麻，拉科入得最多波嘅球員都係得兩粒，幾個所謂射手近幾場仲冇波入過㖭；畢爾包都唔好得幾多，主力射手阿度里斯近4場都冇「士哥」，2串1有3.75倍，希望新年有個好開始。
寫完稿落去太子球壇茶座見到流浪漢總管象哥，佢一見到我就起身急急腳埋單走人，我見咁嘅環境知道一定有嘢。佢話：「領隊！趕時間呀！」我又用嗰招望實佢，結果佢都停低話：「你有所不知！本來教頭想新年放日假等班人回氣，但接到球場電話租咗場唔用有麻煩，一定要去簽場兼搵人去球場行吓先計數，仲話球場有閉路電視，冇人用死得。仲罰得好重！」真唔知呢啲例對職業隊啱定唔啱。
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive