早排因不滿建制派暗批地區撥款，喺區議會抗爭卻被保安抬走的民主黨區議員許智峯，據知已成為建制派狙擊對象，近期區內建制派開始發功，支持區內一名女牙醫搞活動，睇嚟想喺年尾區議會選舉搶走阿峯個位。阿峯同八方講，佢一直有做地區工作，加上個女牙醫最近一年先「空降」，所以仍然對連任有信心，而阿峯為打好選戰同抽時間陪屋企人同仔女，據知幾個月前由新界搬去上環住，慳番唔少交通時間。至於曾經同阿峯喺地區撥款單嘢開戰嘅中西區區議會主席葉永成，最近就有西環街坊發現，突然猛喺寶翠選區插旗仲開埋議辦，相信呢個隱形建制派，將會接替該區建制派區議員林懷榮，迎戰上屆以極少票選輸咗、好可能捲土重來嘅白鴿黨律師楊浩然。