長毛梁國雄、社民連副主席黃浩銘同委員陳寶瑩噚日向法庭申請，想今日入旺角部份區域，事關今日社民連喺旺角酒樓舉行會慶，主席同副主席無理由唔出席啩！喺控方唔反對下，裁判官准佢哋今日下晝5點至凌晨12點進入指定地區。主控官就提醒佢哋三個，12點一定要離開，八方即時諗起童話故事嘅灰姑娘……長毛笑住話：「知道喇，不過如果醉咗我就唔知！」
至於一樣喺旺角清場時被捕嘅學生前線「四眼哥哥」鄭錦滿，就因為涉喺聖誕日凌晨響旺角阻差辦公，違反禁足旺角既保釋條件而被還柙九日，噚日佢終於可以保釋，但本月14日再提堂前都唔准去禁足令地區，連搭車轉車都唔可以。四眼哥哥庭外即刻喺fb專頁報平安。長毛應訊後稱：「法庭應該考慮人權多過政治需要，否則就會出現14歲少女連儂牆事件。」社民連三人同四眼哥哥都係被控響11月尾旺角清場時阻礙執達主任執行職務。