地鐵西港島綫通車，以後港大學生住在將軍澳的也可以乘地鐵返學，方便之至，西港島綫興建期間，有街坊投訴塵土飛揚，噪音滋擾，不過鐵路起好之後，就覺得交通好方便咯。由中環到堅尼地城，因為上蓋冇空間交俾港鐵起樓，港鐵得個做字，賺唔到錢，唔似得將軍澳綫咁，淨係康城一期、二期……地皮賣完又賣，港鐵與發展商可以賺到笑。咁條西港島綫益咗邊個呢？梗係現時嘅沿綫業主啦，特別係堅尼地城站出面嘅大廈，例如泓都，啲呎價肯定看漲，或者早已升定先。幾年前記者小B未返紐約前，住在堅尼地城一個好細單位，已經要交租近萬元，依家通車後，睇怕租金會大漲咯。啲業主過往幾年其實乜都唔使做，叠埋心水等納稅人付鈔嘅地鐵完工就淨收利益，幾爽神，唔怪得孫中山曾經想話引進中國之土地稅，（即Henry George在十九世紀提出之Land Value Tax），至今仍然大有市場。
唔係業主嘅店舖租客，以前在堅尼地城可能嘆人流少生意差，到咗通車之後，人流多晒，又會哀嘆應付唔起新租金嘅啫，此乃發展之代價，有能者居之嘅資本主義規則。食家V自己喜歡入廚煮食，聽過堅尼地城有一間西餐廳幾唔錯，以前因交通不便，唔肯去，有咗地鐵之後，佢自己一於從中環坐車去到堅尼地城站，只需約七分鐘，從C出口行出去一條叫做爹核士街，地鐵職員都唔識講俾佢聽在邊一個方向，卒之問到行人嘞，哎吔，英文叫做Davis Street，幾十年前港府師爺譯做爹核士街，有啲亂嚟。約行六分鐘往海皮方向就搵到一間Bistro Du Vin（法國餐館），好彩佢一早訂位啫，「全院滿座」噃，叫個洋葱湯，頭盤要骨髓蝸牛，主菜要農場雞，甜品要索夫喱，食家V話一半食物要打包，食唔晒，佢話食物冇得彈，價錢合理，佢又小心留意到啲杯碗係有名產品，例如載索夫喱嘅杯係Le Creuset，荷李活道有一間舖頭專售。佢話類似呢類餐館大概唔怕加租啩。夥計話俾食家V聽：「訂位要早呀，今晚已經滿晒，千祈唔好即興walk-in，否則必定敗興而回。」咁巴閉？夥計拿出新城財經台與「香港味之年賞」顧問委員會，發起出版嘅一本「香港味之年賞」新書，呢間Bistro就在第130頁，評級為最高級嘅AAA，與文華扒房相同，不過價錢就差得遠咯。