周日沙田舉行七草三泥賽事，草地用C加3欄，估計場地掛牌為好至快地。睇番今季14場好至快地之C加3欄賽事，當中六場屬1200米或以下，結果差不多由前置馬包辦所有頭馬，以最近12月7日為例，就有「彩耀全球」及「陽明囍囍」放頭帶到，反觀八場1400米或以上賽事，除了「桃花心」放頭贏馬之外，其餘頭馬都係居中或者後上勝出，所以大家要有兩手準備，短途揀前置馬，中距離就要捧後上馬。
今戰列陣馬中，第二場「時來風送」跑田C加3欄1600米六次攞到兩W三P佳績，熱身後改配韋達跑強項隨時贏得。另外，第六場「搖錢樹」跑田C加3欄一次即在今戰之1800米贏馬，反而在其他移欄未嘗一勝，憑較佳場地性能可贏今季第二W。
至於三場泥地賽都係跑1200米，今季11場同程日賽，總共有九匹頭馬守前三位入直路建功，可見泥地短途利放唔利追，三場「神童」、五場「偉寶之星」及八場「飛龍駒」等擅跑泥地之放頭馬可優先留意。