李斯特城經過大半季之後雖然繼續包尾，但於快車期表現唔錯，3戰搶得4分；相反同樣藍衫兼同處下游嘅愛華頓卻命運迥異，快車期竟然3場輸晒。
有巴利、巴克里同盧卡古好手壓陣嘅愛華頓，於聖誕新年快車期嘅對手只係史篤城、紐卡素同侯城，講真唔太難打，不過佢哋嘅表現就令球迷非常失望，竟然3場輸晒；其中於元旦日訪侯城，半場就失守，被艾穆罕默迪同舊將謝拉域攻破大門，完場前更有後衞艾卡拉斯領紅牌出場，最終輸0:2。
愛華頓喺快車期冇任何分數落袋，𠵱家喺聯賽榜得21分，由之前嘅第11位下跌至第13位，僅比尾3嘅水晶宮多4分，而且落後第5位嘅熱刺13分，不過領隊馬天尼斯有信心球隊可於下半季反彈：「𠵱家係挑戰時刻，但我哋需要向前看，為球季下半季而戰。毫無疑問我哋好難接受𠵱個成績，必須要再加把勁。冇錯，我哋有好多傷兵，但我哋同時亦有一班好有天份嘅球員。」
愛華頓於快車期表現差，好彩其他下游球隊都唔好得去邊，其中新特蘭同西布朗同樣只得1和2負，昆士柏流浪、水晶宮同般尼齊齊錄得2和1負，否則愛華頓隨時跌到更低位置。
識睇，一定係睇足英台【英波Live】：
http://soccer.appledaily.com
http://bit.ly/engballlive