立法會建制派想進一步限制示威者佔領示威區，八方聽聞立會行政管理委員會下星期一開會，就會討論係咪要縮短示威人士的逗留時間，例如規定示威人士要係立法會會議結束後離開示威區、甚至禁止示威人士帶帳篷進入示威區，等示威人士「冇得留低」！
有泛民中人講笑話，立法會係民選議會，點樣講，市民始終係議員「老闆」，𠵱家竟然要限制「老闆」去示威區，更加要指明唔畀帶呢樣嗰樣東西入去示威區，好難同市民交代，亦都講唔過去喎。
不過民建聯議員葉國謙就唔係咁睇，佢話立會示威區係開放畀不同團體人士表達意見，有人長期佔領並唔合適，而且亦冇必要帶帳篷進入示威區，所以禁止都合理。
正所謂風水輪流轉，建制派如果落死閘，日後要吹雞去立法會晒馬，可能都受影響而礙事㗎。