警察肩負「慈母」責任，處理佔領行動，「照顧」夜晚出街嘅市民、細路，日以繼夜、夜以繼日出動，累積大量OT時數，加加埋埋，估計政府可能要畀多億幾元皇糧，即係呢排大時大節，差人就算冇時間出外豪遊，都有多啲彈藥「鳩嗚」過節。
點知，有啲Claim form填錯嘢彈返轉頭，搞到部份差人出糧時搵唔到9月和10月啲OT費，失晒預算。昨日有警隊內部消息話嚿錢可以喺今個月12號出番，應該趕得切幫補交第一期稅。至於11月同埋12月啲OT費，只要同事可以喺9號前交到Claim form，應該可以如期喺本月底出糧時出埋，變相「出雙糧」過肥年。
據聞蝦碌係因為今次啲OT錢要跟應付佔領的Solarpeak行動入數，唔同平時啲OT跟環頭入數，可能有啲Admin同事幫夥計入錯Code，所以彈返回頭。警察由警員到總督察都可以申請補水，每粒鐘最少有百一蚊，最多差唔多五嚿水。