2015年第一場NBA，就係公牛主場對金塊，雖然戲碼唔算好強，不過以爭標為目標嘅公牛就好落力，特別防守方面，全隊就造出18次封阻（蓋火鍋），單係西班牙前鋒加素就創個人新高有9次，幾乎拎到大三元，公牛亦驚險以106:101反勝，打響新一年頭炮。
反勝金塊新年響頭炮
公牛前冠軍教練積遜都講過，要成為總冠軍除咗靠進攻，好防守先係重點。公牛呢場15年第一擊，就真係幾慢熱，半場以42:53落後。唔想喺聯合中心主場失威，公牛第3節急起直追，中鋒諾亞同前鋒加素都連番出手蓋火鍋，打窒對手度氣。進攻方面，就由占美畢拿同戴歷路斯負責，一度打出22:8嘅攻勢，喺第3節完結前以3分反超前。第4節加素繼續佢嘅蓋火鍋威力，封阻金塊前入樽王尼特羅賓遜嘅投籃，加上戴歷路斯嘅火熱手感，保住領先優勢贏5分，以23勝10負排東岸中央組榜首，落後東岸「1哥」速龍只係場半勝仗。
公牛全隊造出18次封阻，創出隊史新高，而加素個人就有9次，亦都係佢職業生涯新高，連埋佢攻入17分同9個籃板，差啲可以大三元，加素有啲可惜咁講：「有9次封阻確實唔係常見，亦都係我自己14年球員生涯嘅新高，我對呢啲數字都好留意㗎。」公牛教練泰保杜就大讚今仗嘅內線球員，泰保杜賽後話：「封阻對球賽影響好大，我哋班大隻佬呢場比賽好集中，其實對手都有唔少高佬，好彩我哋勝在反應快，亦都靠呢啲封阻，換到輕鬆得分。」
識睇，一定係睇足英台【英波Live】：
http://soccer.appledaily.com
http://bit.ly/engballlive