呢排個個政界中人都將幫助年輕人向上流掛喺口邊，唔通真係貪呢個口號好得意咩？花生友就覺得，啲人點會真係隨口噏，梗係收到靈通消息，搶先飲吓頭啖湯，事關梁振英14號公佈嘅最新一份施政報告，據知會宣佈推出「配對基金」畀非牟利組織申請，藉派錢助創業增加年輕人向上流動機會，減少對政府不滿喎。
後佔領時代公關手法
到底派錢打救青年減怨氣，呢條橋到底work唔work？花生友雖然唔係年輕人，但都覺得未必治到本。只要上吓網同高登巴打及絲打打吓招呼，就知道好多年輕人嘅不滿係嚟自對政治制度嘅不滿啦，無啦啦塞錢畀佢哋創業把鬼咩？
學民發言人劉貳龍都唔知點解政府「講呢啲」，佢話青年難向上流係制度所致，而更大嘅怨氣更係嚟自對政制嘅不滿，覺得呢個配對基金，無非係後佔領時代嘅公關手法箒，只係畀人知道政府有做嘢，諗啲政策出來塞住各界把口箒。
姑勿論配對基金有冇用吖，但肯定有一個實效，就係畀咗機會建制政黨拉banner成功爭取；花生友發現，民建聯同經民聯同樣喺今年施政報告諮詢提出協助青年創業建議。
民建聯倡議向經評核嘅年輕人提供上限30萬元免息貸款，並為佢哋提供營商培訓及顧問服務，經民聯就促政府斥資50億成立青年創業基金，為創業青年提供低息貸款，由銀行審批，政府擔保80%本金並津貼50%利息開支。唔知好想「打救」年輕人嘅兩大黨，邊個掛banner會快人一步呢？
花生友