多間影碟發行商，喺聖誕前谷完一輪新碟，就索性暫休派碟，幾套較有睇頭嘅如《失蹤罪》、《移動迷宮》等，都要等到今個月先陸續上場。截稿時正係2014年最後一次寫《潛龍碟影》，雖然冇乜港版影碟心水選擇，不過見港台合拍片《屍城》出咗，有龍叔叔喜愛嘅喪屍同Jessica C.，二話不說畀百三蚊買「雙C」返屋企煲碟。一套喪屍片，其實可以玩得好多樣化，荷李活玩得高章嘅，有韋史密夫嘅《I am Legend》、畢彼特嘅《World War Z》，就連電視劇《The Walking Dead》都係水準之作。當然，cult片拍法更好玩，羅拔·洛迪格斯嘅《索女喪屍機關槍》，甚至乎港產片《生化壽司》，都係令龍叔叔再三回味之作。
《屍城》由台灣導演錢人豪操刀，幾年前一齣由網民集資拍嘅《Z-108棄城》，劇情爛得都幾徹底，但不負責任嘅拍法，反而有一種豪邁嘅態度。今次有香港電影公司水喉射住，反而綁手綁腳，連呢丁點優勢都冇埋，劇情無聊、剪接混亂、無厘頭式爆頭爆肚灑血花，播片途中去個廁所、打個電話你都會懶得搵個remote暫停。冇所謂，最緊要有喪屍同JC，而事實上《屍城》的三級程度，確實滿足到喜愛血腥暴力同色情嘅觀眾，影片初段未有喪屍，十幾個唔同故事背景嘅女演員（當然包括JC），全部唔係露bra就係短褲小背心，差啲以為電影預算低到冇錢買衫。
劇情上極不負責任，點解啪丸會變喪屍？點解全城都係喪屍？點解斯文教師可以主宰世界？點解個囡變喪屍仲會乖乖留喺身邊？全部都係一個謎，冇所謂，睇得喪屍片預咗冇邏輯。可惜，《屍城》連最基本嘅血腥同色情都處理得極差，全套戲只戴bra大show警鐘胸嘅JC，一邊走佬一邊搖晃，睇到中段都係咁，幾養眼都冇用啦。喪屍又好似豆腐做咁，一拳就爆頭，又好似對腸格外有興趣，專捉人當場抆大腸嚟食，女演員全裸露點肉搏唔夠5秒，無啦啦異變咬J，總之血花大平賣，RGB三原色入面，紅色出現比率肯定超過一半。呢種拍法一啲都唔cult，龍叔叔睇完忍唔住讀歪啲嚟作總結。
喪屍妝夠認真
優點唔係冇，特技化妝幾認真，算有荷李活B級片質素。JC後半部剪短頭髮，出奇地有股純真美麗，袁嘉敏SM女王look亦算有睇頭。龍叔叔較喜愛形象健康嘅王敏德變做壞差佬殺人搶錢強姦無惡不作，差佬原來可以咁黑暗，帶出一種等同粉筆畫牆要入女童院嘅荒謬感。龍叔叔最有感受係其中一句對白：「都世界末日了，還過甚麼生日？」港人喺慶祝2015年來臨時，會唔會都有啲共鳴？
可能票房仆直，新戲BD居然只賣$130，當消磨時間尚可，聲畫上就冇乜好要求。反而bonus特技化妝解構幾好睇，看似簡單嘅喪屍妝，原來要倒模又化成六七粒鐘妝先搞掂。勞苦功高嘅演員，睇完電影成品後，可能會激到嘔一斤真血。
Profile
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
