【ATV告急之打者愛也】開台57年的亞視，在老闆王征掌管下，積弱成疾一蹶不振，不但拖欠員工薪金，續牌更凍過水。作為電視專業人員協會會長的徐小明，昨日指目前未收到亞視員工求助，他昨日接受訪問說：「𠵱家勞工處介入咗，所以佢哋冇向個會求助，如果有員工要幫忙，我哋會盡力提供協助。」曾經是亞視三朝元老的徐小明，認為亞視弄到今日田地，絕對是經營手法出了嚴重問題。
聽台歌打冷震
在亞視曾效力18年的徐小明三進三出，為該台炮製了《大俠霍元甲》、《陳真》和《馬永貞》等劇，又一手購入《還珠格格》和《雍正皇朝》等受歡迎內地劇與無綫火併，結果令無綫陣腳大亂。在他主管製作部的亞視曾經輝煌過，如今亞視要面臨倒閉，他自言是愛之深、責之切，他表示：「首先我唔明亞視做乜鬼攞《大俠霍元甲》隻歌嚟做台歌，呢首係講國仇家恨民族歌，根本唔適合做台歌，𠵱家搞到我一聽呢隻歌就打冷震。仲有近年我長期喺內地做嘢，難得返香港開亞視嚟睇，發現我以前製作嘅幾套舊劇不停重播，更好睇都睇到會嘔啦！完全冇嘢睇，根本係逼人轉台，啲老闆咁樣去經營一個電視台，點會唔出事。」
徐小明認為慳錢有慳錢做法，但不是像現在的亞視，投資者幾乎是零資源投放在製作上，他記得當年邱德根年代，老邱是少數能賺錢的老闆，他笑說：「邱德根係好慳，但當年佢都明白應使得使，會將錢放喺刀口上，所以佢年代，我哋決定要拍嘅《再向虎山行》、《武則天》同《陳真》等好劇，佢好肯落本去拍，最終佢能夠賺錢走人，確實係因為佢經營有方。但𠵱家王征佢哋，一味慳，完全唔投放資源畀製作同新聞部，繼續咁經營落去，個台只會越做越萎縮，唔會有出路。」
採訪：鍾國仁