本地波班霸「少林寺」個新班主近期成為新聞人物，原本大鑼大鼓入主，又話會幫球會搵乜乜物物國腳返嚟，結果自從季初捧完個盃仔後，就清除異己，又炒教練又炒職員，搞到而家連一班球會忠實球迷都反佢，真係本地波異數，令小弟諗番起遠古時「快活谷」嘅班主「兩個口」，以前搞波，一遇上不滿判決就叫拉隊離場，仲俾球迷大叫「坐低啦」。不過喺「金魚缸」，兩個口真係出神入化嘅人物，財技高超過畢菲特，唔少支持佢公司嘅小股民真係「愛死佢」。
講開財技，AC米蘭就真係喺意大利，甚至係全球最叻嘅球會；最新一單，就係費蘭度托利斯「愛回家」事件。原本都以為AC米蘭借完費托，等車路士放畀馬體會。點知睇真啲轉會細節，原來係AC米蘭用咗300萬歐元，同車仔買斷咗費托，然後就立即借番畀馬體會，再賺番筆；仲可以喺馬體會借前鋒阿利斯奧施斯返嚟。雖然我唔知30歲嘅費托仲有幾多貨交，但AC米蘭話咁易就簽入一個假假地都曾經值5,000萬鎊轉會費嘅國腳級射手，一吓唔覺意，費托喺馬體會翻生，AC米蘭又隨時執多幾百個賣走佢。再講之前啲神級借人，羅賓奴、艾辛都已經勁，高價賣卡卡畀皇馬，點知卡卡去到皇馬打唔起，AC又可以借番佢，直頭當皇馬係水魚，仲有啲拖欠轉會費嘅新聞，AC啲超級財技真係罄竹難書。
又到咗1月，轉會市場重開，即係話又係AC表演財技嘅機會，最近就有傳佢哋睇中咗皇馬借將前鋒查維亞靴南迪斯（白衫），睇吓佢哋又點樣借上借。
文：牽牛