創興銀行（1111）創辦人廖氏家族第三代成員廖偉芬（Jennifer）近十年發展The Coffee AcademÏcs與HABITŪ兩個咖啡連鎖店品牌，做到有聲有色，舊年11月佢仲嘗試賣茶，喺銅鑼灣開咗一間專門賣茶嘅Coffee AcademÏcs，點知華華噚日行過，發現呢間舖裝修緊，門口變咗The Coffee AcademÏcs，兩個月話變就變？
華華趕唔切試吓呢間新舖賣乜茶，佢已經改頭換面，真係冇辦法品評呢間舖有冇得做。睇番Coffee AcademÏcs嘅宣傳單張，話係以現代手法泡製中國傳統飲品，唔通大家都係寧願上茶樓飲茶，接受唔到現代手法？不過咁，咁都反映Jennifer係醒目女，轉身夠快，話變就變啫。
聽講，呢間舖嘅業主係Jennifer媽媽廖湯慧靄，廖太旗下紀惠集團喺香港擁有大量商舖、寫字樓收租，呢間舖忽然裝修變身，短時間冇得做生意，唔知Jennifer有冇叫媽媽畀多個月免租期呢？