隔牆有耳：
超人拖孫女元旦祭亡妻 - 李八方

一如過往嘅元旦，長實集團主席李嘉誠噚日同家人，一齊拜祭亡妻莊月明；可能係新年新開始啦，八方見超人噚日心情不知幾咁輕鬆。
佢喺約朝早7點10分左右，喺6名保鑣陪同下，同細仔李澤楷分別坐私家車到柴灣佛教墳場，精神相當唔錯嘅超人，一落車見到在場記者，笑笑口打招呼問：「你邊間？」半個鐘後，大仔李澤鉅同太太王儷橋及囡囡亦坐私家車到場，兩母女仲分別戴上黑超同帽遮臉。其實喺佢哋到達前，兩名女管家已經一早去到墳頭準備同打掃乾淨，仲帶咗兩束百合花。

一家齊腳後上香

當一家齊腳後，超人就率領各人喺墓地前誠心上香，其間超人同細仔有傾有講，大仔則對囡囡細心體貼，親自幫阿女整理凌亂頭髮。約一粒鐘後，超人拖住孫女離開，仲對守候記者講拜拜，但就冇回應任何提問。