大概費托係世界上最不幸嘅「王子」；不過有咩比失魂落魄嘅王子奇遇更合女球迷心意？失意射手「顛沛流離」，7年後重返母會，雖然不排除有花生友等睇笑話，但人總喜歡看鹹魚翻生、奇蹟反彈嘅感人戲碼。
𠵱位前鋒上周落實被借到馬體會後，終於現身馬德里，並喺周三首次隨球隊練習。自07年離開轉投利物浦後，費托狀態每下愈況，摩連奴再執掌車路士後更備受冷落，事業可以話跌至谷底。不過費托抵達馬德里機場，即被不少球迷包圍影相同拎簽名，難怪王子首節操練笑容滿面，自信心即刻返晒嚟。費托11歲就加入馬體會青年軍，17歲第一次為一隊上陣，出戰214場西甲為球會射入過82球，球迷熱烈歡迎王子回歸，對費托不離不棄其實不難理解。王子首節操練絕不「欺場」，只係見佢第一次現身訓練場唔係近距離射失目標，就踩中鐵環纏腳，不禁為佢本月7日於西班牙盃對皇馬嘅「第2次地標」擔心。
此刻嘅費托就好似一塊巴馬火腿，只有夠肥美嘅豬，先可以捱得到長時間嘅風乾歲月，否則早已被風乾至渣滓。費托被「風乾」多時，但求王子重返英雄地可以爭一口氣，成為西班牙人嘅國寶火腿。
文：呂晨