唔知係咪因為李寶利手風順，抑或練馬師蘇保羅旺氣帶挈，總之第四場四班千二米，就係由「點解」一放到底大熱取勝。呢匹四歲馬由賢轉蘇廐即贏，情況似足上次賽事由潘頓建功，亦是轉蘇廐即贏之「競技英雄」，咁啱兩駒幕後都係「軍事出擊」馬主梁芷珊一路人馬，蘇保羅對佢哋都算交足功課，而蘇廐近五戰四次有馬贏共取五Win，旺到不得了。
「點解」上季在港初出即勝，之後一直贏唔番，不過就場場唔係第三就第四，冇甩過獎金，呢場轉倉初出，熱到唔夠兩倍1.9倍開跑，結果由起步到衝線都係最快嗰隻，末段彈甩馬群輕勝，李寶利連埋第三場贏「環保之星」，一冷一熱包辦第三口孖寶。今次同時係李寶利重臨後，首度幫蘇保羅贏馬，咁啱兩人之前合作第一Win，正係去年元旦憑大熱門「勝飛」拎到，真係夾埋都冇咁啱。
「點解」由香港飛馬團體擁有，此團體有四位美少婦，除了梁芷珊，仲有馮柏基太太黃婉曼、豚王老闆鄧振豪太太Giselle及楊耀宗太太前影星吳雪雯，不過今日缺少兩個，不見黃婉曼及吳雪雯，但賽後拉頭馬時仍熱鬧，另一美女李寶利未婚妻Kimberley亦有亮相。