民建聯一如以往舉行年度漢字評選，向來被網民戲稱為「禮義廉」嘅民記，今年除咗該黨被網民話冇嘅「恥」字，更連「廉」字都消失埋，只篩選出「穩、憂、法、讓、危、禮、愛、義、亂、望」十個字畀市民投票。
民記噚日公佈結果，最終「法」字獲最多人投票，成為年度漢字。評審之一嘅立法會主席曾鈺成話，去年發生佔領行動，社會對法治問題作討論係好事。其實民記今次選舉都算落重本，投票選中年度漢字嘅市民可以參加抽獎，頭獎有iPhone 6 Plus（16GB）一部，二獎iPad Air 2一部，三獎係BEATS耳機一部，安慰獎更多達15名，每人可獲500蚊超市禮券。估唔到連選漢字都有咁多名貴禮品派喎。