正所謂「剃人頭者，人亦剃其頭」，安祖卡路爾係轉會市場嘅大騙子，轉會利物浦身價大插水，𠵱家踢韋斯咸都仲未完全及格；點知呢位英格蘭前鋒就喺現實生活遇上騙子，以為有着數買名牌平貨，結果做咗大水魚，同「大儍」領隊艾拿迪斯，同其他隊友夾埋唔見3萬鎊（約36萬港元），真係新年唔快樂。
似足「瑞士山區肺」橋段
話說12月12日就有位貌似推銷員咁嘅人士去到韋斯咸練習場，拎住名牌F&M嘅禮物盒同Harrods香檳貨辦，話可以以一個超低價幫槌仔幫職球員代訂，呢啲喺電影《龍咁威2003》先會出現嘅「瑞士山區肺」橋段，相信唔少香港人睇過《警訊》都識得拆穿，偏偏班韋斯咸職球員就竟然信到十足十，安祖卡路爾仲大嗱嗱拎8,000鎊（約96,000港元）出嚟訂貨，大儍亦都不甘後人拎3,000鎊，成隊韋斯咸夾夾埋埋買成3萬鎊貨㖭。
點知過埋聖誕新年都未收到貨，成班水魚先如夢初醒，遇上名牌騙子；球會即刻報警求助，警方仲搵埋當日練習場嘅閉路電視調查，點知發現呢個騙子連環犯案，連英冠嘅諾域治職球員都俾佢呃咗。當然英冠球員冇英超兵咁有米，全隊只係損失5,000鎊。
不過講真，2011年1月利物浦用成3,500萬鎊由紐卡素收購安祖卡路爾，點知安祖就做咗「銀樣蠟槍頭」，睇得唔打得，傷多過踢，搞到上季要割價1,500萬鎊賣畀韋斯咸，一來一回紅軍唔見2,000萬鎊，卡路爾都算係紅軍大騙子；今季都只係入咗3球，連埋上季都係交出5個聯賽入球，對一個千萬身價射手，都唔叫做及格啦；話時話呢個騙子會唔會係紅軍球迷想報仇呢？英國警方大可從呢個線索入手查案。
識睇，一定係睇足英台【英波Live】：
http://soccer.appledaily.com
http://bit.ly/engballlive