見到費蘭度托利斯回歸馬德里體育會（圖），腦海就諗起一句歌詞：「又回到最初的起點，記憶中你青澀的臉。」兜兜轉轉，費托返到去成名地，亦係佢再次展翅飛翔嘅最後機會。
費托嘅職業生涯幾有趣，前半段有入波但冇冠軍，即係喺馬體會出道以及轉會利物浦嘅時代，佢入好多波，但就係贏唔到西甲、英超以至歐聯。2012年，係佢足球生涯嘅轉捩點，變成冇入波但有冠軍，佢加盟車路士，突然成個人運氣轉晒，唔識入波，但喺車仔就狂捧盃，又英足盃又歐聯，仲拎埋歐霸盃。雖然佢喺車仔嘅表現幾差，但冇聽話有人會憎費托，大部份都係戥佢可憐，搖頭嘆息；或者笑佢「廢托」、「書到用時方恨少，球到門前托利斯」之類，可能呢啲就係靚仔嘅好處。
講番費托嘅前路，佢呢次返馬體會，外界對佢期望唔高，認為佢只係文迪蘇傑同基沙文嘅替補。其實咁都幾好，呢幾年喺車仔，費托承受壓力太大，佢把握力變差，除咗體能下滑之外，相信同心理都有關係。再者，返到熟悉嘅環境，對佢重拾信心都有幫助，而且仲見番以前啲好兄弟，例如現役隊長基比。對於馬體會嚟講，費托亦都有用，除咗等啲球迷興奮吓外，佢哋亦需要一位有級數嘅後備射手，因為今季使咗成千萬歐元買返嚟嘅墨西哥前鋒魯爾占美尼斯表現麻麻。最後，寄望費托可以喺成名地搵番對射門鞋。文：咖喱